- قصة رعب في الأردن .. اختفاء مفاجئ قصة رعب في الأردن .. اختفاء مفاجئ - qalam2 -->
U3F1ZWV6ZTE5Njg1NzI2OTY3X0FjdGl2YXRpb24yMjMwMTIxMjc5MzM=
recent
أجدد المواضيع على قلم2

قصة رعب في الأردن .. اختفاء مفاجئ

قصة رعب في الأردن .. اختفاء مفاجئ

قصة رعب في الأردن .. اختفاء مفاجئ، رعب
اختفاء مفاجئ

منطقة القويسمة في الاردن في العاصمة عمان
سمعت صوت باب البيت وهو بفتح الساعة 1 بالليل .. غريب بهيك وقت حدا من إخواني يطلع برا ..
رحت عند الباب لقيت أخوي بفتح بالباب ، سألته وين طالع ؟!

بحكيلي :
( هووووس .. وطّي صوتك .. بدي انزل على الغرفة تحت أجيب تلفوني ، نسيته هناك )

بسأله وبحكيله ، متأكد إنك كويس؟؟؟ بحكيلي، ابعد عن طريقي خليني أجيب تلفوني ، هسا برجع .. لا تسكر الباب، وهو نازل على الدرج ، بطلّع فيه وشفته ماسك تلفونه !! بحكيله ، ولك هي تلفونك بإيدك يا مجنون !!
عمل حاله مش سامعني ، وضل نازل تحت على الغرفة، بالعادة ما بطلع، دايماً أولاد خالي وأولاد عمي بجتمعوا عنا وبلعبوا " شدّة بالغرفة تحت تقريباً عاملينها زي مضافة، الغرفة اللي تحت بيتنا كانت أصلاً مغارة وأبوي زبطها وعملها غرفة لحتى نتسلى فيها مع صحابنا، صارت الساعة 2 بالليل وبعده رائد ما أجى ..
والله خايف كثير عليه فجأة الحجة صحيت من النوم بتصرخ وبتحكي ( أخذوووه ) كل البيت عنا صحي على صوت الحجة بسم الله عليكي ، شو في ؟؟ كانت تحكي - أخدو راااااائد أولاد الحرراااام
الكل صار يسأل وينه رائد ؟؟ مش موجود على سريره ؟! حكتلهم إنه نزل على الغرفة قبل ساعة ، لانه نسي تلفونه ولهسى ما رجع !! نزلنا كلنا على الغرفة ، ورائد مش موجود تحت !!!!!!
اتصلنا على تلفونه كان مغلق، اخواني الـ4 مع ابوي كل واحد شغّل سيارته ، وبلشوا يدوّروا عليه بشوارع القويسمة ( حوالين السكة ، المعادي ، حديقة الملكة رانيا ، أم نوارة )، رجعوا على البيت الساعة 5 الصبح ، وما في أي أثر إله !!
كل العيلة عنا عرفو بالموضوع ، أجو علينا الصبح واجتمعوا لحتى يعرفو اللي صار، خالي صار يقول :
" اليوم راح نضل ندوّر عليه وإذا ما بيّن ، بكرا بنقدم بلاغ للأمن العام والبحث الجنائي "
نشرنا صورته تقريباً بكل شوراع القويسمة ، ونسأل الكل .. بس ما فيه أي جواب عنه ، وما حدا شافه، الساعة 11 بالليل ، أجى مسج لأخوي ، إنه رائد فتح تلفونه !! اتصلنا مرتين ما رد ، بعد شوي رجع رائد واتصل فينا بنسأله وين إنت ؟! برد علينا أنا ما بعرف وين أنا ، مش شايف قدامي أي شي
 طيب تعال على البيت !! رجع رد علينا ما بقدر آجي على البيت .. حاسس في حدا مربّط إيديي وجسميز الصوت كان فيه تشويش وسكّر الخط !! اتصلنا فيه مرة ثانية .. كان تلفونه مغلق.
إمي انجنت وصارت تعيّط .. خالي طلب من الجميع كل واحد يشغّل سيارته ويبلشوا يدوّروا بكل منطقة القويسمة تقريباً سيارات اخواني مع صحابهم وقرايبنا كانو 20 سيارة، من الساعة 12 بالليل للساعة 4 الفجر .. وعلى الفاضي ، مش مبيّن رائد !! ثاني يوم ، قدمنا بلاغ للبحث الجنائي والبحث الجنائي حدد مكان تلفون أخوي إنه موجود بمنطقة ( أبو علندا ) ورحنا كلنا على المكان، الموقع كان بعمارة مهجورة .. من برا منظرها كثير بخوّف ، صرلها سنين طويلة صحابها تاركينها اخواني وخالي كان معهم دورية بحث جنائي ، دخلوا على العمارة وصاروا يدوّروا فيها .. لكن للأسف رائد مش موجود جوا !!
ضابط البحث الجنائي بحكيلنا ، إنه الأجهزة عندهم مستحيل تغلط ، والقمر الصناعي أعطاهم إنه هون موجود تلفون رائد !! صرلنا 5 أيام ما بنعرف ننام .. اللي بصير مش طبيعي !! يعني وين بده يكون موجود ؟! ما خلينا مكان إلّا وبحثنا فيه، كنا بنستنى البحث الجنائي يتصلوا فينا ويعطونا أي معلومة عن رائد، أكثر شي كان مُحير إنه تلفون رائد مرات بفتح ومرات بصير مغلق .. ولما نتصل عليه ما برد !!
أخوي محمود راح على الشغل الساعة 9 الصبح ، ما في ساعة إلّا وكان جاي على البيت، حكينالو مالك ليش مروّح بدري ؟! بحكيلنا محمود ، إنه شاف رائد اون لاين على الفيسبوك .. وبعتله مسج ( وين إنت ؟! ) رائد رد عليه : ( ما بعرف .. هيني موجود بشارع طويل وما في ناس والدنيا ليل .. هي في واحد طويل بلحق فيي .. أنا تعبان كثير .. تعالوا خدوني ) المصيبة إنه أخوي رائد ضعيف بالقراءة والكتابة ترك المدرسة من الصف الثالث بس كانت طريقة الكتابة صحيحة ١٠٠%، بلّغنا البحث الجنائي عن المسجات ، وتم الإشتباه إنها حالة خطف !! في حدا ماسك تلفونه وقاعد بكتب عنه.

طلبوا منا البحث الجنائي نستمر بالتواصل معه على ماسنجر الفيسبوك وأخدوا من أخوي باسورد الفيسبوك تبعه لحتى يعملوا على تحليل المسجات، ضابط البحث الجنائي بحكي لأبوي ، إنهم لما كانوا يتتبعوا تلفون رائد على القمر الصناعي كان مرات يعطيهم إنه موجود على طريق المطار في العاصمة عمان، ومرة أعطاهم إنه في بمنطقة في محافظة معان على الطريق الصحراوي جنوب المملكة الأردنية، وآخر مرة أعطاهم اللوكيشن إنه تلفون رائد موجود عندكم بنفس البيت !!

المسجات اللي كان يبعتها رائد :
- ابعتلي جاكيتي يا محمود ، الجو عندي بارد
- مشان الله تعالووا خدووني
- في واحد جنبي هيو بطلّع علي بشبه الشياطين
- هههههه
- الجو باااارد
- حاسس حالي بدي أموت
- في ناس كثير حوالييّ
- احكي لامي تنزل تحت ، قاعدين بنادوا عليها!!

تدخلت شعبة مكافحة الجرائم الإلكترونية وصار في تعاون بينهم وبين البحث الجنائي لحتى يحلّلوا المسجات وما كان في أي نتيجة، في واحد شيخ من قرايبنا الشيخ معروف على مستوى الوطن العربي وقليل جداً ما يجي على الأردن دايماً مسافر وبطلع يعالج الناس برا ويفك السحر سمع بالمصيبة اللي إحنا واقعين فيها وأجى عنا زيارة وحكناله القصة كاملة، سأل إمي شو الحلم اللي أجاكي لحتى صحيتي وإنتي بتصرخي !! صارت تحكي إنها بالحلم كانت تنظف بالبيت وما كان حدا موجود نزلت على الدرج وكنت بشطف فيه شفت رائد بدو يفتح الغرفة وكان الباب مسكّر صرت اصرخ عليه لا تفتح الباب يا راااااائــــــــــد، دخل على الغرفة وسكّر الباب وراه ،لحقته لحتى أجيبه من الغرفة .. والباب ما فتح معي !!

صار يقول الشيخ ، رائد هيو موجود تحت ، وهيني سامع صوته ..

صار يقول الشيخ ، رائد هيو موجود تحت ، وهيني سامع صوته المغارة اللي تحت مسكونة وهدول الجن إلهم خصوصياتهم ، وما بصير ضلكم تزعجوهم هيني بدي أنزل تحت وأحكي معاهم ، بس بشرط إنكم تسكروا الغرفة وما تدخلوها مرة ثانية، بعد ربع ساعة ، طلع من الغرفة وصار يحكي الشيخ .. بكرا الصبح بإذن الله بكون عندكم على باب البيت.

أخواني صاروا يحكوا للشيخ ، إحنا واقعين بمصيبة وإنت جاي تتمسخر علينا !!! طردوه برا البيت ، وأخوي محمود صار بده يضربه !! ثاني يوم الصبح الساعة 8 ، كان جرس البيت برن، أصبحنا وأصبح الملك لله فتحت الباب لقيت رائد نايم عند باب البيت وما في حدا موجود غيره !! صرت أصرخ  وأجو كل أهلي على صوتي، بنحاول نصحّي فيه ، مش راضي يصحى، أخدناه على مستشفى البشير ، ودخل بغيبوبة لمدة 3 ايام كان ضعفان كثير نازل 10 كيلو تقريباً، الدكتور عم بحكي إنه الفحوصات الطبية سليمة 100%، بعد ما صحي رائد كلنا كنا حواليه سألناه عن اللي صار معه !؟
حكالنا مش متذكر ولا شي !! آخر شي متذكره رائد إنه كان نازل يجيب تلفونه بعد ما دخل على الغرفة ، تسكّر الباب لحاله وانطفى الضو ..
..
الاسمبريد إلكترونيرسالة